Austriaku gjendet i vdekur në lumin Drin: Çfarë ndodhi?

Shtetasi austriak Roman Rainer, është gjetur pa shenja jete në lumin Drin, në afërsi të Klinës, disa orë pasi ishte raportuar i zhdukur.

Rasti është raportuar në orët e para të mëngjesit, pasi një familjar kishte njoftuar Policinë se Rainer nuk ishte lajmëruar në telefon që nga dita e djeshme.

Zëdhënësi i Policisë për Rajonin e Pejës, Driton Rugova, ka bërë të ditur për Sinjalin se rasti është raportuar rreth orës 02:35 në Stacionin Policor në Klinë, pas së cilës njësitet policore kanë ndërmarrë veprimet për kërkimin e tij.

Pas disa orësh kërkime, rreth orës 10:10, personi është gjetur në lumin Drin, në afërsi të Klinës, por pa shenja jete. Vdekjen e tij e ka konstatuar ekipi mjekësor në vendin e ngjarjes.

Në vendin e ngjarjes kanë dalë hetuesit e Sektorit Rajonal për Hetime në Drejtorinë Rajonale të Policisë në Pejë, si dhe prokurori i Shtetit.

Me urdhër të prokurorit, trupi i pajetë është dërguar në Institutin e Mjekësisë Ligjore në Prishtinë për obduksion.

Rasti është iniciuar si “Hetim i vdekjes”, ndërsa hetimet për zbardhjen e rrethanave të rastit janë në vazhdim.

Sinjali – aty ku e vërteta flet para lajmit!

/GazetaSinjali/